Hoxe, como estou de boas, deixovos unha escolma de fotografias que atopei pola rede dun lugar que me trae moi bos recordos, polo moito que aprendín alí e pola grandísima xente coa que tiven a oportunidade de compartir aulas e experiencias universitarias. Espero que vos sirva para achegarvos un pouco a este belo rincón da Universidade de Santiago de Compostela, eu creo que é dos máis fermosos.
Na parte superior da fachada destaca o seu escudo, e demáis ornamentacións. Estilo neoclásico, pois esta facultade data do século XVIII cando se construíu no solar do antigo convento dos xesuítas.
Xa dentro, nos recibe un vestíbulo coa escaleira, maxestuosa, e o claustro ao fondo. O claustro articula o edificio, as aulas e demáis dependencias se distribúen en tres andares en torno a el.
Dende esta porta se sae ao balcón da fachada principal, algunha vez se ten visto algunha pancarta en época de reivindicacións universitarias, pois é esta unha casa de pensamento crítico.
Unha das xoias máis prezadas é a biblioteca, sen dúbida non hai foto que lle faga xustiza á sensación de estar alí, o aroma do papel antigo, o ruído da madeira ao camiñar sobre ela, o saber acumulado por séculos…
A outra xoia é o paraninfo, pois este edificio non está situado na Praza da universidade por unha casualidade, esta foi unha das primeiras sedes da universidade concebida como tal, con aulas, paraninfo, secretaría, biblioteca… é sen dúbida a estancia máis fermosa da facultade.
En definitiva, un marco incomparable para estudar e unha boa recomendación para visitar.
Iván Fernández Coba 