Despois de pasar tres meses do meu primeiro regreso das terras nórdicas á horta murciana, chega o momento do retorno definitivo á Terra de Trasancos que se fixo de rogar máis do que quixese, como tamén vén sendo habitual -mea culpa.
O período vacacional que se abre en Murcia coa celebración da Semana Santa e das Festas de Primavera ofréceme a oportunidade de pasar un par de semanas na miña terra, non é moito pero espero que colmen as miñas ansias ata a chegada do vrao.
Falando de despedidas, se onte facía homenaxe ao nacemento dun gran músico, hoxe toca despedir a outro dos grandes, faleceu en Suecia o mestre cubano Bebo Valdés. Sirva coma pequena e humilde homenaxe este vídeo dunha actuación súa en directo nunha gala de TVE celebrada na Praza do Obradoiro de Santiago de Compostela, en compañía de Diego “El Cigala” interpretando o célebre tema “Lágrimas Negras”.